7. Царю ж отложивше всякие государственные и земские дела правити и росправу чинити, почал с своими князи и бояры и околничими и думными людми мыслити о женидбе своей, кого из бояр и из думных и из ближних людей, и из их жен, обрати в какой свадебной чин, во отцово и в материно место, и в сидячие бояре и в боярыни, и в поезжаня, в тысецкие и в бояре и в дружки, и в свахи, и в свещники и в коровайники и в конюшенной чин и в дворецкие, так же и с царевнину сторону сидячих бояр и бояронь и дружек и свах. И мысля о том многие дни, указал, для такия своея царския радости, думным дьяком росписати на роспись: кому в каком в том свадебном чину бояром и околничим и думным и ближним людем, и их женам, в чинех же быти, по своему обранию, кого в какой чин излюбил, не по родом и не по чином и не по местом, где кому в каком чину указано быти, и тому по тому и быти, а написав тое роспись, закрепити им же дьяком и поднести ceбе. А свой царской указ бояром, и околничим, и думным и ближним людем, велел сказати, при многих людех: чтоб они к тому дни, в которой день у него будет радость, в том чину кому где указано быть, были готовы без мест, не по роду и не по чином; а как у него будет радость, и в те дни будет кто из них бояр и околничих и думных и ближних людей учинят в свадебном деле, породою своею или местами или чином, какую смуту, и в том свадебном деле учинится помешка, и того за его ослушание и смуту казнити смертию, безо всякого милосердия, а поместья его и вотчины взяти на царя; так же и после свадбы никому никого никакими словами о свадебных чинех не поносити, и в случаи не ставити, кто кого в чину выше ни был, а кто кого учнет поносити, а себя высити, и про то сыщется, и тому от царя быти в великой опале и в наказании.