3. Такъже и в-ыных болших и середних городех бывают воеводы столники и дворяня, и дьяки, и подьячие вместо дьяков; а велено им в тех городех дела всякие делать по наказом же и по Уложению. А которых великих дел ведати и делати им не указано, и о таких делах велено им писати к Москве ж.
А в судных кабалных делех велено им суды давати, дворяном, и детем боярским, и служилым всяких чинов и посадцким людем, и крестьяном, в болших городех, где воеводы с дьяками, в долговых делех во 100 и в 500 и в 1000 и в 10,000 рублев. А в-ыных городех, где воеводы одни сидят, или и с подьячими, а дьяков не бывает, велено суды давати в долговых делех в 10 и в 20 рублех, а болши дватцати рублев суда давати им не велено никому; а будет кто воевода, или приказной человек, болши 20 рублев суд даст, и тот суд не в суд, да на нем же судье возмут на царя пеню.
А велено середних и менших городов всякого чину людем в болших своих искех судитися на Москве, кто где судим и под которым Приказом написан. А в самых болших городех, хотя в великих искех дают суды в 1000 и в 10,000 рублех, а обвинити они бес царского указу никого не смеют.